himanshi babra poetry|dukhi ghazal||ہمانشی بابرہ کی غزل انتخاب

غزل

ہمانشی بابرہ

himanshi babra poetry|dukhi ghazal||ہمانشی بابرہ کی غزل انتخاب 

لوگ تو لوگ ہیں لوگوں کی طرح دیکھتے ہیں

ایک ہم ہیں اسے بچوں کی طرح دیکھتے ہیں

 

ہم کو دنیا نے لکڑ ہارا سمجھ رکھا ہے

ہم تو پیڑوں کو پرندوں کی طرح دیکھتے ہیں

 

تم تو پھر غیر ہو تم سے تو پھر شکایت کیسی

میرے اپنے مجھے غیروں کی طرح دیکھتے ہیں

تیرا دیدار قضا ہوتا نہیں ہے ہم سے

ہم تجھے دیکھنے والوں کی طرح دیکھتے ہیں

۔۔۔۔۔۔۔۔۔۔۔۔۔۔۔۔۔۔۔

غزل

 

میری خوشبو کو ہواؤں میں اڑانے والا

لوٹ  کے آیا نہیں چھوڑ  کے جانے والا

 

پیار کے ساتھ مجھے طعنے دیا کرتا ہے

 تجھ میں بھی رنگ ہے کچھ کچھ زمانے والا

 

ایسے بچھڑا ہے کہ ملنے کی  دعا کرتا ہے

ہر ملاقات پہ منہ پھیرکے  جانے والا

۔۔۔۔۔۔۔۔۔۔۔۔۔۔۔۔۔۔۔

 

غزل

 

 

ساتھ دینے کا دلایا تھا بھروسا تونے

اور پھر چھوڑ دیا مجھ کو اکیلا تو نے

 

اپنی مرضی سے مجھے چھوڑ کے جانے والے

میری مرضی کو کہاں چھوڑ دیا تھا تو نے

 

 بات رخسار کی ہوتی تو کوئی بات نہ تھی

آج تو روح پہ مارا ہے تمانچا    تو نے

 

ہائے افسوس! تجھے اب بھی یہ  معلوم نہیں

زندگی میری بنا دی ہے تماشا تو نے

 

جیسے تیسے میں بنا روئے چلی جاتی مگر

کس لیے دیکھ لیا مڑ کے دوبارہ تو نے

۔۔۔۔۔۔۔۔۔۔۔۔۔۔۔۔۔۔۔

 

غزل

 

سوچا  نہیں تھا میں نے کبھی تیرے جیسا شخص

منہ پھیر لے گا مجھ کو پریشان دیکھ کر

 

تو لاکھ بے وفا  ہے مگر سر اٹھا کے چل

دل ر و پڑے گا تجھ کو پشیمان دیکھ کر

 

ظاہر نہ ہو کہ تجھ سے میرا واسطہ بھی ہے

سب کی نظر ہے تجھ  پہ میری جان دیکھ کر

۔۔۔۔۔۔۔۔۔۔۔۔۔۔۔۔۔۔۔۔۔۔

 

غزل

 

دل کی بستی میں اجالا نہیں ہونے والا

میری راتوں کا خسارا نہیں ہونے والا

 

میں نے الفت میں منافع کا نہیں سوچا تھا

میرا نقصان زیادہ نہیں ہونے والا

 

وہ ہمارا ہے ، ہمارا ہے ،ہمارا ہے فقط

باوجود اس کے ہمارا نہیں ہونے والا

 

اس سے کہنا کہ  میرا ساتھ نبھائے  آ کر

میرا یادوں سے  گزارا نہیں ہونے والا

 

آج  اٹھا ہے مداری کا جنازہ لوگوں

کل سے بستی میں تماشا نہیں ہونے والا

۔۔۔۔۔۔۔۔۔۔۔۔۔۔۔۔۔۔

غزل

 

دل ایسے مبتلا ہوا تیرے ملال میں

زلفیں سفید ہو گئیں انیس سال میں

 

ایسے وہ رو رہا تھا میرا حال دیکھ کر

آیا ہوا ہو جیسے  کسی انتقال میں

 

یہ بات جانتی ہوں مگر مانتی نہیں

دن کٹ رہے ہیں آج  بھی تیرے خیال میں

 

اک بار مجھ کو اپنی نگہبانی سونپ دے

عمریں گزار دوں گی تیری دیکھ بھال میں

۔۔۔۔۔۔۔۔۔۔۔۔۔۔۔۔۔۔

 

غزل

 

کھینچ کر درد کی دہلیز پہ لائے ہوئے لوگ

زندگی خاک جئیں تیرے ستائے ہوئے لوگ

 

بد نصیبی  کی گھٹاؤں نے مجھے گھیر لیا

سائے  سے پہلے گئے میرے کمائے ہوئے لوگ

 

کم نصیبی  پہ کبھی  بیٹھ کے  روئیں گے ضرور

آپ کو دیکھے بنا   لوٹ کے آئے ہوئے لوگ

 

کرتے رہتے ہیں ترا ذکر زمانے بھر میں

یاد کرتے  ہیں تجھے تیرے بھلائے ہوئے لوگ

۔۔۔۔۔۔۔۔۔۔۔۔۔۔۔۔۔۔۔۔

 

 

  آپ مزید پڑھ سکتے ہیں:۔