والد کی وفات پر از ندا فاضلی|Urdu poetry||والد کی وفات پر اشعار|Nida fazli

  

 ''والد کی وفات پر"   از  ندا فاضلی

ندا فاضلی کے والدکا انتقال کراچی میں ہوا اور وہ ان کے جنازے میں شرکت نہ کر سکے ۔نا رسائی کا یہ دکھ اس نظم میں شدت سے محسوس کیا جا سکتا ہے ۔فاضلی کہتے ہیں میں نے یہ نظم روم میں ایک تقریب کے دوران پڑھی تو ایک گوری خاتون نے کہا:"ندا فاضلی تعجب  کی بات ہے تم اپنے باپ کی موت پہ اب تک نظم لکھتے ہو''

تو کہتے  ہیں میں نے جواب دیا :''اس میں تعجب والی کون سی بات ہے میرا تو صرف ایک ہی باپ تھا ''اس نے جواب دیا یہ یورپ ہے یہاں نہ باپ رہا نہ خدا۔۔۔۔۔۔

تو فاضلی صاحب نے جواب دیا:''میں جس تہذیب سے آیا ہوں وہاں باپ کبھی نہیں مرتا''

عنوان:والد کی وفات پر

تمھاری قبر پر

میں فاتحہ پڑھنے نہیں آیا

مجھے معلوم تھا

تم مر نہیں سکتے

تمھاری موت کی سچی خبر جس نےاڑائی تھی

وہ جھوٹا تھا

وہ تم کب تھے

کوئی سوکھا ہوا پتا ہوا سے مل کے ٹوٹا تھا

مری آنکھیں

تمھارے منظروں میں قید ہیں اب تک

میں جو بھی دیکھتا ہوں

سوچتا ہوں

وہ وہی ہے

جو تمھاری نیک نامی اور بد نامی کی دنیا تھی

کہیں کچھ بھی نہیں بدلا

تمھارے ہاتھ میری انگلیوں میں سانس لیتے ہیں

میں لکھنے کے لیے

جب بھی قلم کاغذ اٹھاتا ہوں

تمھیں بیٹھا ہوا میں اپنی ہی کرسی میں پاتا ہوں

بدن میں میرے جتنا بھی لہو ہے

وہ تمھاری

لغزشوں ناکامیوں کے ساتھ بہتا ہے

مری آوازمیں چھپ کر

تمھارا ذہن رہتا ہے

مری بیماریوں میں تم

مری لاچاریوں میں تم

تمھاری قبر پر جس نے تمھارا نام لکھا ہے

وہ جھوٹا ہے

تمھاری قبر میں میں دفن ہوں

تم مجھ میں زندہ ہو

کبھی فرصت ملے تو فاتحہ پڑھنے چلے آنا۔۔۔۔۔

والد کی وفات پر از ندا فاضلی|Urdu poetry||والد کی وفات پر اشعار|Nida fazli